لاہور (لاہورنامہ) پولیس نے مناواں کے علاقے میں 10سالہ بچی ماریہ کو قتل کر کے نعش سوئمنگ پول میں ڈبونے والے درندہ صفت ملزم کو گرفتار کرلیا ۔
سی سی پی او غلام محمود ڈوگر نے پریس کانفرنس کرتے ہوئے بتایاکہ ملزم علی رضا نے معصوم بچی کو اکیلا پا کر زیادتی کا نشانہ بنا ڈالا،منہ اور گلا دبا کر قتل کر دیا۔سفاک ملزم نے گھنائونے فعل کو حادثے کا رنگ دینے کے لیے مقتولہ کی لاش سوئمنگ پول میں پھینک دی۔
ماریہ اپنے بھائی سجاد اور 05 سالہ بہن عجرہ کے ساتھ ملزم کے سوئمنگ پول پر نہانے آئی تھی۔سوئمنگ پول کا مالک علی رضا بچی کو بسکٹ کا لالچ دے کر کینٹین کے پیچھے لے گیا۔ماریہ کے کافی دیر نظر نہ آنے پر بہن بھائی نے سوئمنگ پول مالک سے دریافت کیا۔ملزم علی رضا نے مقتولہ ماریہ کے بہن بھائی کو کہا کہ ان کی بہن گھر چلی گئی ہے۔بعد ازاں ملزم نے مقتولہ کے سوئمنگ پول میں ڈوب جانے کا ڈرامہ رچا دیا۔اصل ملزم تک پہنچنے کے لیے 11مشکوک افراد کے ڈی این اے اور پولی گراف ٹیسٹ کروائے گئے۔
مقتولہ بچی اور ملزم علی رضا کے نمونے پنجاب فرانزک سائنس لیبارٹری بھجوائے گئے۔سی آئی اے اورانویسٹی گیشن پولیس کی مشترکہ ٹیموں نے شب و روز کی محنت کے بعد ملزم کو گرفتار کیا۔
سی سی پی او کا کہناتھا کہ مضبوط چالان مرتب کر کے ملزم کو کیفر کردار تک پہنچائیں گے۔ہائی پروفائل کیسز حل کرنے پر ڈی آئی جی انوسٹی گیشن اور ان کی ٹیم کو مبارکباد پیش کرتا ہوں،یہ ہمارے لیے انتہائی چیلنجنگ کیس تھا،ہم نے اصل ملزم کو بروقت گرفتار کر لیا ۔
