گوجرانوالہ (لاہورنامہ) ریسکیو 1122 گوجرانوالہ نے ڈسٹرکٹ ایمرجنسی آفیسر میاں رفعت ضیاء کی زیرِ نگرانی شجرکاری مہم کا آغاز کردیا۔
شجر کاری مہم کا باقاعدہ آغاز گاؤں پٹھانکے تحصیل وزیر آباد سے کیا گیا۔
جس میں ایمرجنسی آفیسر آپریشنز انجینئر نعیم اختر، ریسکیو سیفٹی آفیسرز انجم شہزاد، فیاض احمد قمر، کیمونٹی ایمرجنسی ریسپانس ٹیم (ریسکیواسکاؤٹس) اور ریسکیورزنے بھر پور انداز میں شرکت کی۔
شجرکاری مہم کا مقصد ماحولیاتی آلودگی کو کم کرنا اور درختوں کے کٹاؤ کاتدراک ہے۔
گاؤں کی مقامی تنظیم بزمِ احمد نے اس کام میں ریسکیو 1122کے ساتھ مل کرشانہ بشانہ کام کیا جوکہ ریسکیو1122کی رجسٹرڈ کمیونٹی ایمرجنسی ریسپانس ٹیم بھی ہے اور وہاں پر موجود لوگوں نے ریسکیو 1122کے اس اقدام کو خوب سراہا اور پودوں کی حفاظت کا ذمہ بھی اٹھایا۔
ڈسٹرکٹ ایمرجنسی آفیسر میاں رفعت ضیاء کا کہنا تھا کہ پودے انسانوں کو آکسیجن فراہم کرنے کے ساتھ ساتھ ماحول کو خوشگوار بنانے اور درجہ حرارت کو کم کرنے میں مدد فراہم کرتے ہیں۔
پوری دنیا شجرکاری کے ذریعے اپنے ماحول کو محفوظ بنا رہی ہے تو ہمیں بھی شجرکاری کے ذریعے ضلع گوجرانوالہ کے ماحول کو شفاف بنانا چاہیے اور شہر شہر گاؤں گاؤں پودے لگا کر گرین پاکستان کو پایہ تکمیل تک پہنچانا ہے۔
