لاہور (لاہورنامہ) لاہور پولو کلب کے زیراہتمام ہمدان ایبک پولو کپ 2022ء کے دوسرے دن ٹیم ڈی ایس پولو /باڑیز اور ایف جی پولو فاتح رہیں۔
تفصیلات کے مطابق لاہور پولو کلب میں ہمدان ہاؤسنگ کے تعاون سے منعقدہ ہائی گول ایونٹ کے دوسرے دن کے میچز دیکھنے کیلئے تماشائیوں کی اچھی تعداد موجود تھی۔
اس موقع پر لاہور پولو کلب کے صدر عمر صادق، سیکرٹری آغا مرتضی علی خان، ایگزیکٹو کمیٹی ممبرز اور پولو ممبرز کی بڑی تعداد موجود تھی۔ پہلے میچ میں ڈی ایس پولو /رضویز کی ٹیم نے آخری لمحات میں سنسنی خیز مقابلے کے بعد آدھے گول سے فتح حاصل کی فائنل سکور 4.5-4 رہا۔
ڈی ایس پولو /رضویز کی طرف سے حسام علی حیدر نے دو، دانیال شیخ اور سید اون محمد رضوی نے ایک ایک گول سکور کیا جبکہ آدھا گول انہیں ہینڈی کیپ ایڈوانٹیج حاصل تھا۔ باڑیز کی طرف سے ارینسٹو ٹروٹز نے تین جبکہ نفیس باڑی نے ایک گول سکور کیا۔
دوسرے میچ میں ایف جی پولو ٹیم نے شاندار کم بیک کرتے ہوئے آخری چکر میں میچ 9-8.5 سے اپنے نام کیا۔ ایف جی پولو کی طرف سے رومیرو زیولیٹا نے شاندار کھیل پیش کیا اور سات گول سکور کیے جبکہ دیگر میں جولیو نیولیا سٹاڈا نے دو گول سکور کیے۔ ڈائمنڈ پینٹس کی ٹیم کو اڑھائی گول ہینڈی کیپ ایڈوانٹیج حاصل تھا جبکہ دیگر میں ثاقب خان خاکوانی نے چار جبکہ میر حذیفہ احمد نے دو گول سکور کیے۔ اب جمعتہ المبارک کو دونوں سیمی فائنلز کھیلے جائیں گے۔
