لاہور( لاہورنامہ)ریڈیو، اسٹیج ، ٹی وی اور فلم کے سینئر اداکار مسعود اختر پھیپڑوں کے سرطان کے باعث 82 برس کی عمر میں لاہور میں انتقال کر گئے ، شوبز شخصیات نے سینئر اداکار مسعود اختر کے انتقال پر گہرے رنج و غم کا اظہار کرتے ہوئے کہا ہے کہ مرحوم کا شمار فن کے ان چند اساتذہ میں ہوتا ہے .
جنہوں نے اداکاری کے اصول طے کئے ، ان کے انتقال سے پیدا ہونے والا خلاء شاید ہی کبھی پر ہو سکے گا۔ تفصیلات کے مطابق سینئر اداکار مسعود اختر پھیپھڑوں کے سرطان میں مبتلا تھے او ر گزشتہ کئی روز سے ایک نجی ہسپتال میں زیر علاج تھے جہاں وہ گزشتہ روز اپنے خالق حقیقی سے جا ملے ۔ چند ماہ پہلے مسعود اختر کے جواں سالہ بیٹے کی اچانک موت ہو گئی تھی .
جس کی وجہ سے وہ گہرے صدمے میں تھے اور اس کے بعد سے ان کی صحت خراب رہنا شروع ہو گئی تھی ۔ پاکستان کے نامور اداکار مسعود اختر 5 ستمبر 1940ء کو ساہیوال میں پیدا ہوئے اور انہوں نے گوجرانوالہ اور لاہور میں بھی تعلیم حاصل کی ۔ گھر والے انہیں بیرسٹر بنانا چاہتے تھے اور وہ اپنے گھر والوں کی خواہش کو پورا کرنے کے لئے حتی الامکان کوشش بھی کرتے رہے ۔ وہ بینک میں نوکری کے ساتھ ایل ایل بی بھی کر رہے تھے اور اس کے ساتھ انہوں نے ریڈیو پاکستان جانا بھی شروع کر دیا تھا .
اسی دور میں ایک اردو کانفرنس میں ان سے زبردستی ایک کردار کرایا گیا جس کے بعد انہوںنے اسٹیج کی دنیا میں قدم رکھا اور ان کا شمار اسٹیج کے بانیوں میں ہوتا ہے ۔ پی ٹی وی کے آنے کے بعد اس پر کام کرنے والے فنکاروں میں مسعود اختر کا نام بھی شامل ہے ۔ انہوں نے 1968ء میں سلور سکرین پر انٹری دی ۔ شباب کرانوی نے انہیں ایک کردار کی پیشکش کی لیکن انہوں نے انکار کر دیا اور مسلسل تین ماہ تک اصرار کے بعد وہ فلم میں کام کرنے کے لئے راضی ہو گئے اور ان کی پہلی فلم سنگدل تھی جس نے بے پناہ کامیابی حاصل کی۔ مسعود اختر نے اداکاروں کی رہنمائی کے لئے ایک کتاب ایکٹنگ گائیڈ بھی تحریر کی جسے پاکستان سے زیادہ برطانیہ میں شہرت ملی ۔
مسعود اختر کو حکومت کی جانب سے فن کی خدمات کے اعتراف میں 14اگست2015ء کو پرائیڈ آف پرفارمنس سے بھی نوازا گیا ۔ سینئر اداکار قوی خان ، نعمان اعجاز، توقیر ناصر، جاوید رشید، جاوید شیخ، ندیم، پرویز رضا، اشرف خان، محمود اسلم، وسیم عباس، سہیل احمد، نسیم وکی، افتخار ٹھاکر، ندیم بیگ، سید نور ، نغمہ بیگم، سنگیتا بیگم، ثمینہ احمد،شان، نشو بیگم، فضیلہ قاضی، ثمینہ پیرزادہ، حسن عسکری، ناصر ادیب سمیت دیگر نے سینئر اداکار مسعود اختر کے انتقال پر گہرے رنج و غم کا اظہار کرتے ہوئے کہ ان کے انتقال سے ایک عہد اپنے اختتام کو پہنچ گیا ۔ انہوں نے ہر طرح کاکردار نبھایا لیکن اپنے فن کے ذریعے اس کردار میں ایسی جان ڈالی کہ وہ کردار ہمیشہ کے لئے امر ہو گیا ۔ مرحوم کا شمار فن کے ان اساتذہ میں میں شمار ہوتا ہے جنہوںنے اداکاری کے اصول کئے او رجس نے بھی ان کی پیروی کی کامیابی اس کا مقدر ٹھہری ۔ شوبز شخصیات نے دعا کی کہ اللہ تعالیٰ مرحوم کو جنت الفردوس میں اعلیٰ مقام دے اور ان کے اہل خانہ کو صبر جمیل عطا کرے۔
