اسلام آباد (لاہورنامہ)پاکستان تحریک انصاف کے مرکزی رہنما فواد چوہدری نے خبردار کیا ہے کہ عمران خان کو گرفتار کرنے والے کا پاکستان میں رہنا مشکل ہو جائیگا،ایک ہی تجربہ بار بار کرنا احمقانہ ہے، بہت تجربہ ہو چکا، شہباز کی حکومت کو گھر بھیج کر انتخابات کرائے جائیں۔
میڈیا سے گفتگو کرتے ہوئے فواد چوہدری نے کہاکہ پاکستان تحریک انصاف ملکی معیشت مستحکم چھوڑ کر گئی تھی تاہم پاکستان کو خطرناک معاشی بحران میں دھکیلا جارہا ہے، ایک وزیر خزانہ اسحاق ڈار لندن میں بیٹھا ہوا ہے اور ایک پاکستان میں موجود ہے، دانستہ طور پر پاکستان کا دیوالیہ کیا جا رہا ہے۔ایک سوال کے جواب میں فواد چوہدری نے کہا کہ ایک ہی تجربہ بار بار کرنا احمقانہ ہے، بہت تجربہ ہو چکا، شہباز کی حکومت کو گھر بھیج کر انتخابات کرائے جائیں۔
سابق وفاقی وزیر نے کہا کہ معیشت کی تباہی سیاسی بحران کی وجہ سے آئی ہے، کہا جا رہا ہے اگلے 48 گھنٹے بہت اہم ہیں تاہم میں کہتا ہوں 48 گھنٹے بھی اس حکومت کیلئے بہت زیادہ ہیں۔انہوں نے کہا کہ ہمیں 90 دن سے ایک بھی دن اوپر عبوری حکومت منظور نہیں، پاکستان میں 90 دن میں انتخابات کرائے جائیں، آج انتخابات کا اعلان کریں، بیٹھ کر پاکستان کے مسائل حل کریں گے۔
تحریک انصاف کے مستعفی ہونے والے اراکین اسمبلی کی جانب سے سرکاری گاڑیاں اور گھر نہ چھوڑنے سے متعلق سوال پر فواد چوہدری نے کہا کہ سرکاری گاڑیاں اور گھر چوروں کے حوالے نہیں کرنا چاہتے۔عمران خان کی گرفتاری سے متعلق سوال پر رہنما تحریک انصاف نے کہا کہ رانا ثناء اللہ پاگل ہی ہو گا اگر عمران خان کو گرفتار کریگا، جس نے بھی عمران خان کو گرفتار کیا اس کا پاکستان میں رہنا مشکل ہو جائیگا، عمران خان کو گرفتار کرنے والا اپنا پاسپورٹ کمبوڈیا کا بنوا لے۔
