لاہور( این این آئی) پاکستان پیپلز پارٹی کے چیئرمین بلاول بھٹو کے ترجمان سینیٹر مصطفی نواز کھوکھر نے کہا ہے کہ بھٹو زرداری نے وفاق کی ترجمانی کی ہے، ،جن میڈیا ہاؤسز کو چیئرمن بلاول بھٹو زرداری کے بیان پر اعتراض ہے وہ صحافت چھوڑ کر سیاست میں آجائیں،
دفاعی تجزیہ نگار اور ریٹائرڈ جرنیل اپنے تجزیے اپنے پاس رکھیں۔ اپنے بیان میں ترجمان بلاول بھٹو نے کہا کہ پیپلز پارٹی وفاق کی نمائندہ جماعت ہے ،ہمیں پتا ہے کہ ملکی سلامتی کیا ہوتی ہے ،سیاسی قوتوں پر غداری کے فتوے جاری کرنے سے ملکی سلامتی خطرے میں پڑتی ہے،ماضی میں اسی روش نے ملک توڑا اور اب بھی وہی فتوے بازی جاری ہیں۔ انہوں نے کہا کہ پیپلز پارٹی وفاق دشمن قوتوں کے سامنے ہمیشہ دیوار بن کر کھڑی رہی ہے، وفاق دشمن قوتیں ہی آئین کی حدود میں رہ کر حق کی بات کرنے والوں کو غدار قرار دیتی ہیں۔ انہوں نے کہا کہ ملک کو کیسے جوڑے رکھنا ہے یہ حقیقی عوامی نمائندوں سے بہتر کوئی نہیں جان سکتا۔
