کراچی (لاہورنامہ) ملک بھر میں کورونا وائرس سے متاثرہ علاقوں میں اسمارٹ لاک ڈاون کے مثبت نتائج آنا
شروع ہوگئے ہیں اور کورونا کے مصدقہ کیسز میں نمایاں کمی آگئی ہے۔
وفاقی وزیر منصوبہ بندی اور این سی او سی کے سربراہ اسد عمر نے بتایا کہ نیشنل کمانڈ اینڈ آپریشن سینٹر کی طرف
سے متعارف کرائے گئے ایس او پیز پر عملدرآمد اور ملک بھر میں اسمارٹ لاک ڈاون کے نتیجے میں کورونا
کے تشویشناک حالت والے مریضوں میں 28فیصد کمی آئی ہے۔
کورونا کیخلاف یہ کامیابی اسمارٹ لاک ڈاون، ایس او پیز پر عملدرآمد اورعوام کے رویوں میں تبدیلی کی مرہون منت ہے۔
انہوں نے کہا وزیراعظم عمران خان پہلے شخص ہیں جنہوں نے سمارٹ لاک ڈاون کی حمایت کی،
اس فیصلے پر ہم پر تنقید بھی کی گئی تاہم اب پوری دنیا اس حکمت عملی کی طرف آرہی ہے۔
دنیا بھر میں اس بات کااحساس کیا گیا کہ پورے پورے ملک کو بند کرنا ممکن نہیں ہے اور صرف ایک
حل ہےکہ ان علاقوں کی نشاندہی کی جائے جہاں بہت زیادہ کورونا کیسز سامنےآ رہے ہیں۔
وزیراعظم عمران خان کے سامنے جب اسمارٹ لاک ڈاون کی تجویز پیش کی گئی تو اس کی پرزور مخالف سامنے
آئی تاہم جب ملک میں کورونا مریضوں کی تعداد میں کمی آنا شروع ہوگئی تو کئی ترقی یافتہ ممالک نے بھی
اس حکمت عملی کی تائید کردی۔
جرمنی، اٹلی اور پرتگال اب کورونا کے نئے پھیلاو کو روکنے کیلئے لوکل شٹ ڈاون پر غور کر رہے ہیں۔
پاکستان کیلئے سمارٹ لاک ڈاون کا فیصلہ آسان نہیں تھا تاہم وزیراعظم نے مختلف حلقوں کی طرف سے
تنقید کے باوجوداس فیصلے کو اختیار کیا تاکہ کورونا پھیلاو روکنے کے ساتھ ساتھ عوام کو معاشی مشکلات سے بچایا جا سکے۔
