اسلام آباد(لاہورنامہ) پاکستان پیپلز پارٹی کے چیئر مین بلاول بھٹو زرداری نے کہاہے کہ پی ٹی آئی حکومت کی صحت پالیسی درحقیقت صحت سب کیلئے کی بجائے صحت برائے اشرافیہ ہے،صحت کی سہولیات پاکستان کے عوام کا بنیادی حق ہے ، حکومت کو اس حق کو محفوظ بنانے کو یقینی بنانا ہوگا۔
عالمی یومِ صحت پراپنے پیغام میں انہوں نے کہاکہ پی ٹی آئی حکومت کی صحت پالیسی درحقیقت صحت سب کیلئے کی بجائے ‘صحت برائے اشرافیہ ہے۔انہوں نے کہاکہ عمران خان کی حکومت اپنی کرپشن پر مبنی پالیسیز کے ذریعے پاکستانیوں کی صحت کو خطرے میں ڈال رہی ہے۔
انہوں نے کہاکہ صحت کی سہولیات پاکستان کے عوام کا بنیادی حق ہے اور حکومت کو اس حق کو محفوظ بنانے کو یقینی بنانا ہوگا۔ بلاول بھٹو زرداری نے کہاکہ پی ٹی آئی حکومت ادویات کی قیمتوں میں غیرمعمولی 260 فیصد تک اضافہ کر چکی ہے،جس کے نتیجے میں مریضوں کا ایک بڑا طبقہ ادویات کی مقدار کو کم کرنے یا علاج بند کرنے پر مجبور ہے۔
بلاول بھٹو زرداری نے کہاکہ عمران خان کی کابینہ کے دو وزراء صحت کو کرپشن کے الزامات پر عہدوں سے ہٹایا جا چکا ہے۔ انہوںنے کہاکہ دونوں وزراء ادویات کی قیمتوں میں اضافے اور امپورٹ کے اسکینڈلز میں رنگے ہاتھوں پکڑے گئے تھے لیکن اس کے باوجود ان وزراء کے خلاف کوئی ایکشن نہیں لیا گیا جبکہ پی ٹی آئی حکومت نے تاحال صحت عامہ کے ساتھ انتھائی سفاکانہ کھیل جاری رکھا ہوا ہے۔
انہوں نے کہاکہ حکومت سندھ نے جے پی ایم سی اور این آئی سی وی ڈی اسپتالوں پر 100 ارب روپے خرچ کیے ہیں۔ انہوں نے کہاکہ ان ہسپتالوں میں پورے پاکستان سے آنے والے امراض قلب، جگر، کینسر اور دیگر بیماریوں میں مبتلا مریضوں کو علاج ہوتا ہے۔
انہوں نے کہاکہ ان ہسپتالوں میں انتھائی اعلیٰ معیار کا علاج مفت فراہم کیا جاتا ہے لیکن پی ٹی آئی حکومت صحت عامہ کے ان کامیاب ماڈلز کو ناکام بنانے کے لیئے سازشیں کر رہی ہے۔بلاول بھٹو زرداری نے کہاکہ پی ٹی آئی حکومت ان اسپتالپوں پر قبضہ کرنے کے لیئے سازشیں کر رہی ہے،ان کو بھی اْن بے شمار اسپتالوں کی طرح چلانا چاہتی ہے جس طرح وہ ان صوبوں میں چلا رہے ہیں جہاں ان کی حکومتیں ہیں۔
انہوں نے کہاکہ عمران خان نے پہلے COVIDـ19 کو عام فلو قرار دے کر لوگوں کو کہا کہ انہیں ڈرنے کی ضرورت نہیں۔ انہوں نے کہاکہ عمران خان نے وبائی مرض کی پہلی لہر کے دوران سندھ حکومت کی طرف سے لاک ڈاؤن نافذ کرنے کی مخالفت کی،یہ مخالفت صرف اس لئے تھی، کیوں کہ پیپلز پارٹی کی زیرقیادت سندھ حکومت نے وباء سے نمٹنے کے لئے ٹھوس اقدامات اٹھائے تھے۔
انہوں نے کہاکہ پی ٹی آئی حکومت کو حکومتِ سندھ کی پیروی کرنی پڑ رہی تھی۔ انہوںنے کہاکہ عمران خان کی حکومت اب دنیا کی ان چند حکومتوں میں سے ایک ہے، جنہوں نے کوویڈـ19 سے بچاوَ کی ویکسین نہیں خریدی،ایسی حکومتیں مکمل طور پر عطیہ کردہ ویکسین پر انحصار کر رہے ہیں۔
انہوں نے کہاکہ عمران خان کی زیرقیادت ناجائز و نااہل سلیکٹڈ حکومت صرف ملک کی معاشی خوشحالی کے لئے خطرہ نہیں ہے،بلکہ یہ شعبہ صحت عامہ کو بھی منظم طریقے سے تباہ کرنے پر بھی اسی طرح تلی ہوئی ہے،افسوس ہے، پی ٹی آئی کی نیو لبرل پالیسیاں ہر پاکستانی شہری کے لیئے نقصان دہ ہیں۔
بلاول بھٹو زرداری نے کہاکہ یہ پالیسیاں ہر پاکستانی کی معاشی، سماجی، صحت اور سیاسی فلاح و بہبود کی قیمت پر صرف چند افراد کو فائدہ پہنچانے کے لئے کام کرتی ہیں۔
