اسلام آ باد (لاہورنامہ)وزیر خارجہ مخدوم شاہ محمود قریشی نے کہا ہے کہ اللہ نے پاکستان کو عزت اور کامیابی عطا فرمائی، وزیر اعظم عمران خان کی قیادت میں اللہ تعالیٰ نے پاکستان کو سرخرو کیا.
20 وزرائے خارجہ اور 10 نائب وزرائے خارجہ کا او آئی سی وزرائے خارجہ کونسل کے غیر معمولی اجلاس شرکت کرنا پاکستان بڑی کامیابی ہے، 437وفود پاکستان میں منعقدہ اس تاریخی اجلاس میں شریک ہو ئے ، افغانستان کیلئے ٹرسٹ فنڈ کے قیام میں کامیاب ہوگئے۔
وزیر خارجہ مخدوم شاہ محمود قریشی نے او آئی سی وزرائے خارجہ کونسل کے غیر معمولی اجلاس کے حوالے سے اہم بیان میں کہا کہ افغانستان کے بینکنگ سسٹم کی بحالی سے متعلق قرارداد لائے، یہ بہت بڑی پیشرفت ہے،مخدوم شاہ محمود قریشی نے کہا پاکستان،سعودی عرب نے ملکر کردار ادا کیا، دفتر خارجہ کے ساتھ تعاون کرنے والے تمام اداروں اور ان سے متعلقہ شخصیات کا شکریہ ادا کرتا ہوں، مسئلہ طالبان کا نہیں،مسئلہ 38ملین افغان عوام کا ہے.
افغان عوام بھوک اور قحط کا سامنا کر رہے ہیں، افغانستان کو ادویات،خوراک، کی فوری ضرورت ہے، تنخواہ دینے کے پیسے ہوں گے تو اسکولز بھی چلیں گے، عوام کے نکتہ نظر سے امریکا کو اپنے فیصلے پر نظرثانی کرنا چاہیے،وزیرخارجہ نے کہا اتنے ممالک کے نمائندگان کا پاکستان آنا بہت بڑی پیشرفت ہے، اسپیکر قومی اسمبلی، سینیٹ، اور افواج پاکستان کا شکریہ ادا کرتا ہوں، دفتر خارجہ کے عملے نے محنت کرکے کانفرنس کو کامیاب بنایا، پاکستان اور غیر ملکی میڈیا، جنہوں نے اس غیر معمولی اور تاریخی اجلاس کو رپورٹ کیا ان سب کا شکریہ ادا کرتا ہوں، دعا ہے کہ اللہ تعالیٰ پاکستان کو اقوام عالم میں ہمیشہ سرخرو رکھے۔
