اسلام آباد (لاہورنامہ)وزیر اطلاعات مریم اورنگزیب نے کہاہے کہ جینوا کانفرنس پاکستان اور سیلاب متاثرین کے لئے بڑی کامیابی ہے ۔
وزیراطلاعات نے کہاکہ سیکرٹری جنرل اقوام متحدہ، عالمی برادری کا شکریہ ادا کرتے ہیں ، شفافیت کے ساتھ فنڈز کی امانت عوام کو پہنچائیں گے، ان کی زندگیوں میں تبدیلی لائیں گے ۔
انہوں نے کہاکہ انسانیت اور موسمیاتی تبدیلیوں کے کاز کو موثر انداز میں اجاگر کرنے پر عالمی اور ملکی ذرائع ابلاغ کا شکریہ ادا کرتے ہیں ،یہ کانفرنس انسانیت کے اجتماعی احساس کی علامت بنی ہے ،وسائل کی فراہمی سے سیلاب متاثرین کی نئی اور بہتر زندگی شروع کرنے میں مدد ملے گی ۔
انہوں نے کہاکہ کانفرنس نے موسمیاتی تبدیلیوں کے سنگین اثرات کا دنیا کو احساس دلایا ،کانفرنس نے موسمیاتی تبدیلیوں کے اجتماعی چیلنج کا اجتماعی طور پر مقابلہ کرنے کی سوچ کو ایکشن میں بدلا ہے،کانفرنس انسانیت اور کرہ ارض کی ماحولیاتی بہتری میں اہم عالمی فورم ثابت ہوگی۔ انہوں نے کہاکہ عالمی فورم پر پاکستان اور تمام صوبوں کا کیس پیش کرنے اور اس کی حمایت کرنے والے ملکی اور غیرملکی شرکاء کا بھی پرخلوص شکریہ ادا کرتے ہیں.
سیلاب آتے ہی وزیراعظم شہباز شریف نے تمام صوبوں اور اداروں کو ساتھ لے کر جس طرح اجتماعی کوششیں کیں، یہ اس کے ثمرات ہیں۔انہوںنے کہاکہ یہ اتحادی حکومت کی مشترکہ کوششوں کا عالمی سطح پر اعتراف ہے.
