لاہور(لاہورنامہ)لاہور ہائیکورٹ نے 9 مئی واقعات میں گرفتار خدیجہ شاہ، عالیہ حمزہ سمیت 97 ملزمان کی رہائی کی درخواستوں پر فیصلہ محفوظ کر لیا۔
لاہور ہائیکورٹ کی جسٹس مس عالیہ نیلم اور جسٹس اسجد جاوید نے خدیجہ شاہ و دیگر کی ضمانتوں کی درخواستوں پر سماعت کی ۔سپیشل پراسیکیوٹر فرہاد شاہ نے ملزمان کی درخواست ضمانتوں کی مخالفت کرتے ہوئے کہا کہ مقدمہ میں نئی دفعات لگا دی گئی ہیں، زیادہ تر ملزمان ریمانڈ پر ہیں۔
ملزمان کے وکلاء نے موقف اختیار کیا کہ ہم 9 مئی کے واقعات کی مذمت کرتے ہیں۔جس پر جسٹس مس عالیہ نیلم نے ریمارکس دیئے کہ آپ اگر پہلے مذمت کردیتے تو اب تک جان چھوٹ جاتی، ملزمان کے وکیل نے جواب دیا کہ یہ تو جناح ہائوس کا قبضہ چھڑوانے گئے تھے جس پر جسٹس مس عالیہ نیلم نے کہا کہ آپ اعتراف جرم کررہے ہیں۔
ملزمان کے وکیل نے کہا کہ باہر اندھیرا ہی اندھیرا ہے، عدالت نے ریمارکس دیئے کہ ہر اندھیرے کے بعد روشنی ہوتی ہے۔فاضل بنچ نے استفسار کیا کہ کیا مقدمہ کی تفتیش مکمل ہوئی اور اگر ہوئی ہے تو کیا نتیجہ اخذ کیا گیا، جس پر سپیشل پراسیکیوٹر نے جواب دیا کہ مقدمہ کی تفتیش ابھی جاری ہے۔
بعد ازاں فاضل بنچ نے خدیجہ شاہ، عالیہ حمزہ سمیت 97 ملزمان کی رہائی کی درخواست ضمانتوں پر فریقین کے دلائل سننے کے بعد فیصلہ محفوظ کر لیا۔
