لاہور (ا ین این آئی) قومی احتساب بیورو (نیب ) کی درخواست پر پنجاب اسمبلی میں قائد حزب اختلاف و مسلم لیگ (ن) کے مرکزی رہنما حمزہ شہباز کے گارڈز کے خلاف مقدمہ درج کرلیا گیا۔
نیب کے ڈرائیور ممتاز حسین کی مدعیت میں تھانہ ماڈل ٹاﺅن میں مقدمہ درج کیا گیا ہے جس میں دفعات 353ت پ ،186ت پ ،427ت پ ،B/506ت پ ،148ت پ اور 149ت پ شامل ہیں ۔ مدعی نیب اہلکار نے بتایا کہ میں نیب لاہور میں بطور ڈرائیور ڈیوٹی کرتا ہوں ،جمعہ کے روز صبح ساڑھے بارہ بجے نیب افسران کے ہمراہ حمزہ شہباز کی گرفتاری کے لئے 96ایچ ماڈل ٹاﺅن پہنچا جہاں حمزہ شہباز کے ذاتی گارڈز نے نیب ٹیم پر اسلحہ تان لیا اور مجھے زدو کوب کرتے ہوئے گاڑی سے نیچے اتار لیا اور میرے کپڑے پھاڑ دیئے ، کار سرکار میں مزاحمت کر کے ملزم مذکورہ بالا کی گرفتاری میں رکاوٹ ڈالی اور سرکاری گاڑی کا بایاں شیشہ بھی توڑ دیا ، گاڑی کی ڈگی کو نقصان پہنچا اور مجھے اور دیگر ساتھیوں کو جان سے مار دینے کی دھمکیاں دیتے رہے ۔
دوسری جانب مسلم لیگ (ن) نے بھی نیب اہلکاروں کے خلاف تھانہ ماڈل ٹاﺅن میں درخواست دی ہے جس میں ان کا کہنا ہے کہ نیب نے چادر اور چار دیواری کا تقدس پامال کیا۔
