اسلام آباد (اے پی پی)محکمہ صحت نے گرمی کی شدت کے ساتھ ہی مچھروں اور مکھیوں کے بہتات کی وجہ سے گیسٹرو ( اسہال)، ہیضہ ، یرقان جیسی مہلک امراض کے پھیلاؤ کو روکنے کے لئے عوام سے احتیاطی تدابیر پر عملدر آمد کی ہدایت کی ہے ۔
محکمہ صحت کے حکام نے کہا ہے کہ مچھروں اور مکھیوں کی تلفی کے لئے مناسب انتظام کے ساتھ ساتھ پینے کے لئے پانی اچھی طر ح ابال کر استعمال کریں، کھانا کھانے سے پہلے ہاتھ صابن سے اچھی طرح دھو لئے جائیں، کھانے پینے کی اشیاء کو ڈھانپ کر رکھا جائے ، باسی و گلے سڑے اور کچے پھل و سبزیاں ، کھلے مشروبات ، رنگ دار گولے و قلفی اور دیگر غیر معیاری بازاری اشیاء کھانے سے گریز کیا جائے اور گھر کے اندرونی و بیرونی ماحول کو صاف ستھرا رکھاجائے ۔ انہوں نے کہا کہ اسہال کی صورت میں نمکو ل کا کثرت سے استعمال کیا جائے ، دست کی صورت میں نرم غذا کھانے ، پینے والی اشیاء کے زیادہ استعمال سمیت فوری طور پر کوالیفائیڈ میڈیکل افسر سے رابطہ کیا جائے تاکہ کسی ناگہانی صورتحال کا سامنا نہ کرنا پڑے۔
