اسلام آباد (اے پی پی) پاکستان بلائنڈ کرکٹ کونسل (پی بی سی سی) نے پاکستان کرکٹ بورڈ سے کونسل کے فنڈز بڑھانے کی استدعا کی ہے۔ گزشتہ روز پاکستان بلائنڈ کرکٹ کونسل کے چیئرمین سید سلطان شاہ کی سربراہی میں وفد نے پاکستان کرکٹ بورڈ کے ڈائریکٹر ڈومیسٹک ہارون رشید سے ملاقات کی جس میں پی بی سی سی کے مالی مسائل اور دیگر امور پر تبادلہ خیال کیا گیا۔ ملاقات میں بلائنڈ کرکٹ ٹیم کی کارکردگی کو مزید بہتر کرنے کی تجاویز پر بھی غور کیا گیا۔ اس موقع پر بلائنڈ کرکٹ کونسل کے وفد نے کہا کہ کونسل کا سالانہ بجٹ 16 ملین روپے ہے جبکہ اخراجات ان سے کئی گنا زیادہ ہیں۔ انہوں نے کہا کہ کونسل ملک میں بلائنڈکرکٹ کے فروغ کے لئے ہر ممکن اقدامات کر رہی ہے جس کے لئے فنڈز کی اشد ضرورت ہے اسلئے پی سی بی سے درخواست کی کہ بلائنڈ کرکٹ کونسل کے بجٹ کو 28 ملین روپے کیا جائے تاکہ کونسل مزید بہتر طریقے سے کھیلوں کے فروغ کے لئے اپنا کردار ادا کر سکے۔
