اسلام آباد (لاہورنامہ) پاک فضائیہ کے سربراہ ائیر چیف مارشل مجاہد انور خان نے کہا ہے کہ پاک فضائیہ کی شاندار تاریخ اس بات کی غماز ہے کہ کوئی بھی پیشہ ور فوج تعداد اورساز و سامان کی قلت کو اپنے عزم و ہمت اور بہتر تربیت سے متوازن کر سکتی ہے۔
وہ ائیر پاور سنٹر آف ایکسیلنس میں منعقدہ 53ویں کمبیٹ کمانڈرز کورس کی گریجویشن تقریب سے خطاب کررہے تھے۔
ائیر چیف مارشل مجاہد انور خان نے اس تقریب میں بطور مہمانِ خصوصی شرکت کی۔
تقریب سے خطاب کرتے ہوئے سربراہ پاک فضائیہ نے کہاکہ ”عصر حاضر میں درپیش چیلنجز اور ان سے منسلک حکمت عملی سے اچھی طرح آگاہ ہوکر ہی ہم پاک فضائیہ میں بہترین عسکری تربیت کے حصول کو ممکن بنا سکتے ہیں۔
انہوں نے مزید کہا کہ پیشہ ورانہ مہارت اور سچی لگن کے ساتھ ساتھ بہترین نظم و ضبط اورکامریڈ شپ پاک فضائیہ کے نصب العین کی مؤثر تکمیل کے لئے ضروری ہیں۔
سربراہ پاک فضائیہ نے گریجویٹ ہونے والے افسران میں اسناد اور انعامات تقسیم کئے۔ کمبیٹ پائلٹس میں بہترین کارکردگی کی چیف آف دی ائیر سٹاف ٹرافی اسکواڈرن لیڈر محمد شفاعت نے حاصل کی .
جبکہ کمبیٹ کنٹرولرز میں بہترین کارکردگی کی ائیر آفیسر کمانڈنگ ائیر ڈیفنس کمانڈ ٹرافی اسکواڈرن لیڈر جولیس جوزف نے حاصل کی۔
پرنسپل اسٹاف آفیسرز اور فیلڈ کمانڈر ز کی ایک بڑی تعداد نے تقریب میں شرکت کی۔
