لاہور (لاہور نامہ) ترجمان پنجاب حکومت مسرت جمشید چیمہ نے کہا ہے کہ مسلم لیگ (ن) اور پیپلز پارٹی چاہتی ہے کہ ملک کا نظام آئین و قانون کی بجائے ان کی مرضی کے مطابق چلے جو اب نا ممکن ہے ، ماضی کی حکومتوں نے جتنے بیگاڑ پیدا کئے ہیں وہ ڈسپرین سے ٹھیک نہیں ہو سکتے بلکہ اس کیلئے سرجری کی ضرورت ہے ،
ملک کا مستقبل بے لاگ احتساب سے جڑا ہوا ہے اور اپوزیشن کو چیلنج ہے کہ حکومت کی سطح پر کرپشن کا ایک بھی کیس سامنے لائے ،اللہ والے ٹرسٹ تنظیم کی کاوشیں قابل تحسین ہیں اور ان کا کردارسنہرے حروف میں لکھنے کے قابل ہے ۔
اس موقع پر شاہد لون نے ترجمان پنجاب حکومت کو ٹرسٹ کے منصوبوں کے حوالے سے تفصیلی بریفنگ دی۔ مسرت جمشید چیمہ نے ٹرسٹ کے عوامی فلاح کے منصوبوں کی بھرپور ستائش کی اور ہر ممکن تعاون کی یقین دہانی بھی کرائی ۔
مسرت جمشید چیمہ نے کہا کہ اللہ والے ٹرسٹ کو مختلف مخیر حضرات چلا رہے ہیں اور مستحقین کیلئے دستر خوان کا منصوبہ ان کے دیگر درجنوں عوامی فلاح کے منصوبوں میں سے ایک قابل تعریف منصوبہ ہے ۔انہوں نے کہا کہ وزیر اعظم عمران خان کی قیادت میں حکومت بھی فلاحی ریاست کے قیام کیلئے پیشرفت کر رہی ہے اور ایسی تنظیمیں اور لوگ حکومت کیلئے رول ماڈل ہیں ۔
مسرت جمشید چیمہ نے مزید کہا کہ ماضی کے حکمرانوں نے عوام کی فلاح و بہبود کی بجائے اپنی اور اپنے حواریوں کی ترقی کو ملک کی ترقی کا پیمانہ سمجھا ہوا تھا جبکہ غریب دو سے ایک وقت کی روٹی پر آ گیا تھا ۔
