اسلام آباد (لاہورنامہ)ملک بھر میں پانچ روزہ انسداد پولیو مہم کا آغاز کر دیا گیا ۔
معاون خصوصی برائے صحت کے مطابق پانچ سال تک کے چار کروڑ سے زیادہ بچوں کو ویکسین دی جائے گی ـ فیصل سلطان نے بتایاکہ فرنٹ لائن ورکرز گھر گھر جاکر مہم کو کامیاب بنائیں گے ،مہم میں دو لاکھ پچاسی ہزار فرنٹ لائن ورکرز حصہ لے رہے ہیں۔
فیصل سلطان نے کہاکہ کورونا احتیاطی تدابیر پر عمل کرتے ہوئے مہم چلائی جائے گی۔ انہوں نے کہاکہ مہم سے بچوں کی قوت مدافعت میں اضافہ ہوگا۔
انہوں نے کہاکہ کورونا وبا کے باوجود صحت سہولیات کی فراہمی حکومت کی اولین ترجیح ہے۔ انہوں نے کہاکہ تمام پاکستانی قومی فریضہ سمجھتے ہوئے مہم کی کامیابی میں اپنا کردار ادا کریں۔
کوآر ڈینیٹر قومی ایمر جنسی کے مطابق گذشتہ چھ مہینوں میں ہونے والی کامیاب مہمات کے نتائج دیکھ رہے ہیں۔ ڈاکٹر شہزاد بیگ کے مطابق کامیاب مہمات سے بڑی حد تک کیسزاور وائرس میں کمی آئی ہے۔ انہوں نے کہاکہ فرنٹ لائن ورکرز بہترین کارکردگی سے مہم میں مطلوبہ ہدف حاصل کریں گےـ
انہوں نے کہاکہ والدین بچوں کو معذوری سے بچانے کے لئے ضرور ویکسین دیں۔ انہوں نے کہاکہ بچوں کے بہتر مستقبل کے لئے ویکسین پلانا لازمی ہیں۔
