لاہور(لاہورنامہ)پاکستان مسلم لیگ (ن)کے صدر اور قائد حزب اختلاف شہبازشریف نے بلوچستان اسمبلی کے اپوزیشن ارکان پر لاٹھی چارج اوربدسلوکی کی شدید مذمت کرتے ہوئے کہا ہے کہ بلوچستان اسمبلی کے اپوزیشن ارکان پر تشدد اور انہیں اجلاس میں شرکت سے روکنا فسطائیت کی انتہاہے،
شہباز شریف نے کہا کہ انتشار اور جبر کے ہتھکنڈے غیرجمہوری، غیرپارلیمانی اور غیرسیاسی ہیں،موجودہ حکومت نے بدقسمتی سے جمہوری احتجاج، اختلاف رائے اور تنقید کو ذاتی دشمنی بنادیا ہے.
پہلے قومی اسمبلی میں غیرجمہوری رویہ اپنایا گیا، اب یہی رویے بلوچستان اسمبلی میں نظر آرہے ہیں، بلوچستان اسمبلی میں یہ انتشاراچھی چیز نہیں، انہوں نے کہا کہ ارکان اسمبلی کی عزت ووقار کی پامالی قابل مذمت ہے، قائد حزب اختلاف شہباز شریف نے مطالبہ کیا کہ بلوچستان اسمبلی کے اپوزیشن ارکان کے جائز مطالبات اور محرومیوں کو دور کیا جائے،
حکومت ارکان اسمبلی کی بات سنے، شہباز شریف کا کہنا تھا کہ لاٹھی چارج، اجلاس میں شرکت سے روکنا مسئلے کا حل نہیں۔
