لاہور (لاہورنامہ) انسپکٹر جنرل پولیس پنجاب انعام غنی نے کہاہے کہ عشرہ محرم الحرام کے دوران صوبہ بھر میں پنجاب پولیس تمام دستیاب وسائل کو بروئے کار لا کر مجالس اور جلوسوں کے بہترین سیکیورٹی انتظامات کو یقینی بنارہی ہے اور اللہ کے فضل و کرم، پولیس ٹیموں کی کاوشوں اور پنجاب حکومت کے اقدامات کی بدولت محرم الحرام امن و اما ن سے گذر رہا ہے۔
انہوں نے مزیدکہاکہ یوم عاشورکے مرکزی جلوسوں اور مجالس کی سیکیورٹی کیلئے ہر ممکن اقدامات یقینی بنائے جا رہے ہیں اور انشاء اللہ ماضی کی طرح رواں برس بھی محرم الحرام امن و امان سے گزرے گا۔
انہوں نے مزیدکہاکہ پنجاب پولیس کو تمام مکاتب فکر کے علماء کا تعاون حاصل ہے اور تمام علماء بین المسالک ہم آہنگی، قومی یک جہتی اور اتحاد بین المسلمین کیلئے متحد ہیں اور یوم عاشورسے لے کر12 ربیع الاول تک کے مذہبی اجتماعات میں امن و امان برقرار رکھنے کے لیے ہر ممکن اقدامات کیے جائیں گے۔
انہوں نے مزیدکہاکہ پاکستان کے قیام میں ہمارے آبا ء اجداد نے بڑی قربانیاں دی تھیں لہذا اس ملک کی حفاظت ہم سب کی مشترکہ ذمہ داری ہے اس حوالے سے علمائے اکرام بھی متحد ہو کر اپنا کردار اداکر رہے ہیں جبکہ ہر شہری کو بھی اس میں کلیدی کردار ادا کرنا ہو گا۔ انہوں نے مزید کہاکہ یوم عاشور پر سی سی پی او لاہور سمیت تمام آر پی اوز، سی پی اوز اورڈی پی اوز خود فیلڈ میں موجود رہیں گے اور حساس جلوسوں اور مجالس کی سیکیورٹی کیلئے جدید ٹیکنالوجی سے بھی بھرپور استفادہ کیا جا رہا ہے۔
انہوں نے عوام سے اپیل کی کہ وہ یوم عاشور پر غیر ضروری طورپر گھروں سے باہرنہ نکلیں تاکہ جلوس روٹس سے ملحقہ راستوں کی بندش کی وجہ سے انہیں کم سے کم پریشانی کا سامنا کرنا پڑے جبکہ یوم عاشور پر ڈبل سواری پرپابندی اور موبائل سروس کی بندش بارے ہوم ڈیپارٹمنٹ نے احکامات جاری کئے ہیں جن پر عملدرآمد کے لیے ہر ممکن اقدامات کیے جارہے ہیں۔
انہوں نے آج عالمگیر روڈ، پانڈو سٹریٹ اسلام پورہ میں نویں محرم الحرام کے مرکزی جلوس کے سیکیورٹی انتظامات کا جائزہ لیتے ہوئے افسران کو ہدایات او ر میڈیا نمائندگان کے سوالوں کے جواب دیتے ہوئے کیا۔
سی سی پی او لاہور غلام محمود ڈوگر، ڈی آئی جی آپریشنز ساجد کیانی اور سی ٹی او لاہور منتظر مہدی نے سیف سٹی موبائل کمانڈ سنٹر میں آئی جی پنجاب کو سیکیورٹی انتظامات بارے بریفنگ دیتے ہوئے بتایا کہ محرم سیکیورٹی ڈیوٹی پر تعینات افسران واہلکار پوری طرح الرٹ اور چوکنا ہیں اورشر پسند عناصر کی جانب سے معاشرے میں نقص امن کی کسی بھی سرگرمی یا کوشش کوہرگز کامیاب نہیں ہونے دیا جائے گا۔
سی سی پی او لاہور نے مزید کہاکہ سکیورٹی کے لیے ہر ممکن اقدامات کے ساتھ ساتھ سی سی ٹی وی کیمروں کے ذریعے جلوس کی مانیٹرنگ کو یقینی بنایا جارہا ہے۔ آئی جی پنجاب نے جلوس کے روٹ پر تعینات افسران واہلکاروں کو ہدایات دیتے ہوئے کہاکہ یوم عاشور کے مرکزی جلوسوں کے راستے میں آنے والی عمارتوں اور امام بارگاہوں کی چھتوں پر سنائپر زضرور تعینات کیے جائیں اور اس بات کو یقینی بنایا جائے کہ مجالس اور جلوسوں میں شرکت کرنیوالے عزادار واک تھر و گیٹ اور میٹل ڈیٹیکٹر سے چیک ہوئے بغیراندر داخل نہ ہوسکیں۔
انہوں نے تاکید کی کہ سیکیورٹی انتظامات کے دوران شہریوں کی سہولت کیلئے متبادل راستوں سے ٹریفک کی روانی کا بھی خیال رکھا جائے۔
