لاہور (لاہورنامہ) اسپیکر پنجاب اسمبلی چوہدری پرویزالہی نے کہا ہے کہ نئے بلدیاتی نظام میں عوام کو بہترین سہولیات حاصل ہوں گی،بلدیاتی نظام عوام کو ان کی دہلیز پر فوری سہولیات فراہم کرنے والا نظام ہے، تارکین وطن پاکستان سمیت دوست ممالک کی ترقی میں اہم رول ادا کررہے ہیں۔
تفصیلات کے مطابق اسپیکر پنجاب اسمبلی چوہدری پرویزالہی سے مڈل ایسٹ سے تعلق رکھنے والی سیاسی شخصیات کی ملاقات ہوئی جس میں پاکستان مسلم لیگ میں شمولیت کا اعلان کیا گیا۔ چوہدری پرویزالہی نے کہا کہ وزیراعظم عمران خان اور پاکستان مسلم لیگ باہمی مشاورت سے بلدیاتی نظام میں بہتری کیلئے سفارشات پر غور جاری ہے۔
انہوں نے کہا ہے کہ بلدیاتی نظام عوام کو ان کی دہلیز پر فوری سہولیات فراہم کرنے والا نظام ہے، تارکین وطن پاکستان سمیت دوست ممالک کی ترقی میں اہم رول ادا کررہے ہیں۔ اسپیکر پنجاب اسمبلی چوہدری پرویزالہی نے پارٹی میں شامل ہونے والے رہنماوں کے عہدوں کا اعلان بھی کر دیا ہے۔ بلدیاتی انتخابات کی تیاری کے حوالے سے ضروری ہدایات جاری کی ہیں۔
واضح رہے کہ وفد میں رائے شیر علی، میاں عمران آصف، راجہ جہانگیر عمان، رائے گل شیر، محمد کامران اور میاں محمد ندیم شامل تھے۔ ملاقات میں جنرل سیکرٹری مسلم لیگ پنجاب سینیٹر کامل علی آغا اور مرکزی سیکرٹری اطلاعات مہرین ملک آدم بھی موجود تھے۔ اس ضمن میں رائے شیر علی صدر یو اے ای مسلم لیگ نے چوہدری پرویزالہی کا شکریہ ادا کرتے ہوئے کہا کہ بطور وزیراعلی پنجاب آپ کا دور بہترین تھا،
آپ کے دور میں بلدیاتی ادارے خود مختار تھے، عوام کے مسائل ترجیحی بنیادوں پر فوری حل ہو رہے تھے۔ آل پاکستان مسلم لیگ یواے ای کے صدر رائے شیر علی نے مزید کہا ہے کہ پورے صوبے میں ترقیاتی کاموں کا جال بچھا ہوا تھا۔
