اسلام آ باد (لاہورنامہ) وفاقی وزیر تعلیم شفقت محمود نے کہا ہے کہ ہم پاکستان کے ہربچے کو ایک ہی نصاب دینا چاہتے ہیں، تعلیم کے میدان میں چیلنجزہیں ،ہمارا ٹارگٹ یکساں تعلیم نصاب ہے،
ہمیں ملک میں جمہوریت کو مضبوط کرنا ہے، معیشت اگر چلے گی تو لوگوں کو ملازمت اور خوراک ملے گی، ہم معیشت کے چیلنج سے نمٹنے کی پوری کوشش کر رہے ہیں۔
تقریب سے خطاب کرتے ہوئے وزیر تعلیم نے کہاکہ ہنر کی تعلیم ہمارے لیے سب سے اولین ترجیح ہے، ہماری ترجیح یکساں نصاب تعلیم کا نفاذ ہے۔ واضح رہے کہ گزشتہ ماہ وفاقی وزیرتعلیم شفقت محمود نے ملک میں یکساں تعلیمی نصاب نافذ کرنے کا اعلان کرتے ہوئے اس کو قومی تاریخ میں اہم سنگ میل قرار دیا تھا۔
وفاقی وزیر تعلیم شفقت محمود نے کہا تھا کہ ہمارے نظام تعلیم نے معاشرے کو بھی تقسیم کیا ہوا ہے۔ تعلیم ہمیں دنیا دیکھنے کا طریقہ سکھاتی ہے لیکن جب تعلیم ہی مختلف ہوگی تو معاشرے میں تنا اور مشکل پیدا ہوگی۔ پاکستان تحریک انصاف سے تعلق رکھنے والے وفاقی وزیر تعلیم کا کہنا تھا کہ یکسانیت کا مطلب یہ نہیں ہے کہ ہر کوئی ایک طرح سے سوچے۔ اگر ہماری قدریں مشترکہ ہوں گی تو پھر دنیا دیکھنے کے طریقے ان قدروں کے مطابق ہوں گے کیونکہ تاثرات کا دائرہ کار ایک ہوگا لیکن ضروری نہیں ہے کہ سوچ ایک ہوگی۔
ان کا کہنا تھا کہ قومیت کے جذبے کو بھی بیدار کرنا ہے اوریہ کوئی عجیب بات نہیں ہے۔ دنیا کے جتنے بھی بڑے بڑے ترقی یافتہ ممالک ہیں ان میں ایک قومی نصاب ہے۔
انگلینڈ، جاپان، چین اور دیگر ممالک میں قومی نصاب ہے۔ وفاقی وزیر شفقت محمود نے کہا کہ ہم نے 72 سال میں قومی نصاب نہیں بنایا تو اس سے قوم تقسیم ہوئی۔ یہ ناانصافی اور تقسیم بھی ہے۔ یہ ساری ناانصافی اور تقسیم صرف نصاب سے تو ختم نہیں ہوگی۔
