اسلام آباد(لاہورنامہ)پاکستان تحریک انصاف کے سینئر مرکزی رہنما و سابق وفاقی وزیر ہمایوں اختر خان نے کہا ہے کہ وزیر اعظم عمران خان کا دورہ سعودی عرب انتہائی اہمیت کا حامل ہے ، اس دورے سے دونوں ممالک کے تعلقات مزید مضبوط ہوں گے،
انہوں نے کہا کہ اپوزیشن صرف وزیراعظم عمران خان کے بغض میں مبتلا ہے اس لئے انہیں آگے بڑھتا ہوا پاکستان نظر نہیں آرہا ، آئندہ عام انتخابات میں عوام اپنے ووٹ کی طاقت سے مایوسی پھیلانے والوں سے حساب لیں گے۔
انہوں نے کہاکہ وزیر اعظم عمران خان کی قیادت میں حکومت پوری یکسوئی کے ساتھ مہنگائی میں کمی لانے ،معیشت اورکاروبار کی ترقی کے لئے کوشاں ہے اور خدا کی ذات کامیابیاں بھی عطا کررہی ہے ۔انہوں نے کہا کہ اپوزیشن جتنامرضی واویلاکرلے احتساب کے بیانیے میں کوئی تبدیلی نہیں آئے گی.
وزیر اعظم عمران خان نے معیشت کومشکلات سے نکالنے کیلئے اپنے سیاسی مفادات کو پس پشت ڈالتے ہوئے غیرمعمولی فیصلے کئے ،ملک و قوم کیلئے حکومت اور ادارے ایک پیج پر ہیں اور یہی اپوزیشن کو ہضم نہیں ہو رہا۔انہوںنے کہاکہ اپوزیشن لوگوں کوساتھ رکھنے اور اپنی دلی تسکین کے لئے منفی پراپیگنڈا اور مایوسی پھیلا رہی ہے اورہم انہیں ایسے نعروں سے دل بہلانے سے ہرگز نہیں روکیں گے۔
