لاہور(لاہورنامہ) صوبہ پنجاب میں ڈینگی وائرس کے کیسز میں اضافہ جاری ہے، گزشتہ روز ساڑھے 4 سو سے زائد ڈینگی کیسز رپورٹ ہوئے۔تفصیلات کے مطابق محکمہ صحت کے ترجمان عمران سکندر بلوچ کا کہنا ہے کہ گزشتہ 24 گھنٹوں کے دوران صوبہ بھر سے ڈینگی وائرس کے 456 مریض رپورٹ ہوئے ہیں جن میں صرف لاہور سے 333 مریض رپورٹ ہوئے۔
ترجمان کا کہنا ہے کہ راولپنڈی سے 37، گوجرانوالہ سے 16، سرگودھا سے 8، شیخوپورہ سے 7، فیصل آباد، قصور اور ملتان سے 5، رحیم یار خان سے 4 جبکہ اٹک، بہاولپور اور چکوال سے 3 ڈینگی مریض رپورٹ ہوئے۔ترجمان کے مطابق پنجاب بھر میں رواں سیزن میں اب تک ڈینگی کے کیسز کی تعداد 19 ہزار 21 ہوچکی ہے جبکہ 75 افراد جاں بحق ہوچکے ہیں۔
انہوں نے بتایا کہ پنجاب کے اسپتالوں میں ڈینگی کے 2 ہزار 196 مریض داخل ہیں، پنجاب بھر کے سرکاری اسپتالوں میں اس وقت ڈینگی کے لیے 5 ہزار 517 بستر مختص کیے گئے ہیں۔ڈینگی کے مریضوں کی آسانی کے لیے لاہور کے ٹیچنگ اسپتالوں میں بھی بستروں کی تعداد میں مسلسل اضافہ کیا جا رہا ہے۔
ترجمان کا کہنا ہے کہ گزشتہ روز محکمہ صحت کی ٹیموں نے پنجاب بھر میں 4 لاکھ 68 ہزار 44 ان ڈور اور 1 لاکھ 1 ہزار 204 آٹ ڈور مقامات کو چیک کیا۔ ان میں سے 817 ان ڈور اور آٹ ڈور مقامات سے لاروا تلف کیا گیا۔
