کراچی (لاہورنامہ)مقبول ترین ڈرامے پری زاد کی آخری قسط کو ملک بھر کے سینماوں میں ریلیز کردیا گیا۔غریب اور سانولی رنگت کے سادہ مزاج سچے انسان کے گرد گھومتی کہانی پر مبنی ڈرامے پری زاد کا آغاز 2021 کے وسط کے بعد ہوا تھا۔
ڈرامے میں احمد علی اکبر نے پری زاد کا کردار ادا کیا جو کہ سادہ مزاج، سانولی رنگت کے سچے انسان ہوتے ہیں، جن سے اگرچہ متعدد خواتین تعلقات استوار کرتی ہیں مگر وہ ان سے شادی نہیں کرتیں۔ڈرامے میں پری زاد کو احساس ہوجاتا ہے کہ جب مرد کے پاس دولت آجاتی ہے تو اسے محبت سمیت ہر چیز مل جاتی ہے۔
پری زاد میں اس وقت دلچسپ موڑ آجاتا ہے جب کہ احمد علی اکبر کو ان کے مالک سیٹھ بہت بڑی دولت سے نواز دیتے ہیں۔پری زاد کو اس کی کہانی اور کرداروں کو قدرے حقیقی انداز میں دکھائے جانے کی وجہ سے کافی سراہا گیا ۔پری زاد کو سینماوں میں پیش کیے جانے کے حوالے سے ڈرامے کی ٹیم نے لاہور میں ریڈ کارپٹ بھی سجایا، جہاں ڈرامے کی ٹیم سمیت دیگر شوبز شخصیات نے جلوے بکھیرے۔پری زاد کو 28 جنوری سے 30 جنوری تک سینماوں میں دکھایا جائے گا اور بڑے پردے پر ڈرامے کا اختتام دکھایا جائے گا۔
