اسلام آباد (لاہورنامہ)وفاقی وزیرِ اطلاعات و نشریات فواد چودھری نے کہا ہے کہ حکومت کو وفاق اور پنجاب میں کوئی خطرہ نہیں،جہانگیر ترین پارٹی کیساتھ ہیں ، نقصان نہیں پہنچائینگے.
شریف خاندان کاپیسہ اگرپاکستان آجائے تومعاشی حالات بہترہوجائیں گے،ع مران خان کے لیول کاکوئی شخص پاکستان میں نہیں، اپوزیشن تحریکِ عدم اعتماد پرسوں کے بجائے کل لے آئے ،ان کے گھر والے بھی ان پر اعتماد نہیں کرتے، مرادسعیدنے نازیباالفاظ پرقانونی قدم لیاجواچھی بات ہے۔
جہلم میں میڈیا سے گفتگو کرتے ہوئے وفاقی وزیر اطلاعات ونشریات فواد چودھری نے کہا کہ وزیرِ اعظم عمران خان کا دورہ روس گیم چینجر ہو گا، چین کے بعد روس سے ہمارے تعلقات مستحکم ہوں گے۔وفاقی وزیر نے کہا کہ23 سال بعد پاکستان کے کسی لیڈر کو ماسکو میں دعوت دی گئی ہے، روس کے ساتھ بھی پاکستان کے مستحکم تعلقات قائم ہونے جا رہے ہیں۔
دورہ چین کے موقع پر وزیراعظم عمران خان کا شاندار استقبال کیا گیا۔انہوں نے کہا کہ مولانا فضل الرحمن مریم نواز، شہباز شریف، بلاول بھٹو زرداری سب بونے ہیں، اپوزیشن رہنمائوں کی عالمی سطح پر نہیں سنی جاتی۔انہوں نے کہا کہ ، اپوزیشن منہ اور مسور کی دال ہے،اپوزیشن تحریکِ عدم اعتماد پرسوں کے بجائے کل لے آئے.
سینیٹ میں اکثریت کے باوجود یہ ووٹ پورے نہیں کر سکتے،اسمبلی میں کیا کریں گے۔انہوں نے کہا کہ ہمارے خلاف عدم اعتماد لانے والوں پر ان کے گھر والے بھی اعتماد نہیں کرتے۔ انہوں نے کہا کہ پی ٹی آئی بلدیاتی انتخابات میں جہلم سے کلین سویپ کریگی۔ انہوں نے کہا کہ وزیرِ اعظم عمران خان کی حکومت کو نہ وفاق میں خطرہ ہے اور نہ ہی پنجاب میں ہے۔انہوں نے کہا کہ جہانگیر ترین سے احترام کا رشتہ ہے اور وہ پارٹی کے ساتھ رہیں گے اور اسے کبھی نقصان نہیں پہنچائیں گے۔
انہوں نے کہا کہ کسی صورت پارٹی کو نقصان نہیں پہنچائیں گے۔انہوں نے کہا کہ ہم نے آئی ایم ایف سے ایک ملین ڈالر لیا ہے، لندن میں حسن نواز کے اپارٹمنٹ کی قیمت ہی بلین ڈالر ہے، اگر مریم نواز کے دل میں احساس ہے تو اپنے بھائیوں سے کہیں کہ پاکستان کے پیسے واپس کردیں۔انہوں نے کہا کہ وزیراعظم کابینہ میں توسیع پر غور کررہے ہیں، مزید وزرائے مملکت کابینہ میں شامل کرنا چاہتے ہیں۔
انہوں نے کہا کہ جہلم میں بلدیاتی انتخاب پہلے مرحلے میں ہیں ،پی ٹی آئی کے کارکن کمر کس لیں جہلم کی عوام سے کئے گئے تمام وعدے پورے کئے ہیں ،آ گیا ہے کہ جہلم کے لوگوں کا اعتماد دوبارہ حاصل کیا جائے اور انشااللہ ماضی کی طرح اس بار بھی پی ٹی آئی جہلم میں کلین سویپ کرے گی۔ایک سوال کے جواب میں وزیر اطلاعات نے کہا کہ محسن بیگ نے مراد سعید کیلئے جو بیہودہ زبان استعمال کی اس پر ایف آئی اے نے ان کیخلاف کارروائی کی ۔
انہوں نے کہا کہ پاکستان کا کوئی بھی شخص محسن بیگ جیسے طرز کلام کی حمایت نہیں کرتا،قانون انہیں احترام سکھانا چاہتا ہے ،مراد سعیدنے آگے بڑھ کے معاملے پر ایف آئی آر درج کرا ئی پوری قوم ان کے ساتھ کھڑی ہے۔
