لاہور(لاہورنامہ) وزیر اعلیٰ پنجاب عثمان بزدار نے صارفین کے حقوق کے تحفظ کے عالمی دن کے موقع پر اپنے پیغام میں کہا ہے کہ صارفین کے حقوق کا تحفظ کرنا حکومت کے فرائض میں شامل ہے۔
صارفین کے حقوق کا تحفظ تحریک انصاف کی حکومت کی ترجیحات میں شامل ہے۔ صارفین کے حقوق کے تحفظ کیلئے وضع کردہ حکمت عملی پر عملدرآمد کو یقینی بنایا جا رہا ہے اور صوبہ بھر میں کنزیومر پروٹیکشن ایکٹ نا فذ کیا جا چکا ہے جس سے لاکھوں صارفین مستفید ہو رہے ہیں۔ کنزیومر پروٹیکشن ایکٹ کے تحت پنجاب کے بیشتر اضلاع میں کنزیومر کورٹس قائم کی جا چکی ہیں اور نئے پاکستان میں کوئی بھی صارف اپنے حقوق سے محروم نہیں ہو گا۔
وزیراعلیٰ عثمان بزدار نے کہا کہ صارفین کو بھی اپنے حقوق و فرائض سے آگاہی حاصل کرنے کی ضرورت ہے اوریہ دن منانے کا مقصدصارفین میں ا ن کے حقوق کے بارے میں شعور کا عام کرناہے۔
