اسلام آباد (لاہورنامہ)وفاقی وزیر اطلاعات مریم اورنگزیب کا پاک چین سفارتی تعلقات کے 71سال مکمل ہونے پر چینی سفارت خانہ کا دورہ اور تقریب سے خطاب.
وفاقی وزیر اطلاعات نے وزیراعظم شہباز شریف کی خصوصی ہدایت پر چینی قونصلیٹ کا دورہ کیا اور وزیراعظم کا پیغام بھی پڑھ کر سنایا، مریم اورنگزیب نے کہا کہ پاک چین دوستی پوری دنیا میں ایک مثال ہے، اسٹریٹجک پارٹنر شپ اور سفارتی تعلقات سے پاک چین دوستی کا آغاز ہوا،پاکستان اکنامک کوریڈور، پاکستان کی اقتصادی خوشحالی اور اسٹریٹجک پارٹنر شپ کی مثال ہے جو اس خطے کے نوجوانوں اور آنے والی نسلوں کے لئے معاشی ترقی اور خوشحالی کا مظہر ہے.
پاکستان اور چین کے درمیان تعلقات اس لئے بھی خاص اہمیت کے حامل ہیں کہ یہ پاکستان اور چین کے لوگوں سے شروع ہوتے ہیں، جب بھی کوئی منصوبہ پاکستان میں آتا ہے تو ہمیں یقین ہوتا ہے کہ یہ ہمارے فائدہ کے لئے ہوگا، دونوں ممالک کے لوگ محبت کے لازوال رشتے میں بندھے ہوئے ہیں، کراچی میں چینی شہریوں کے ساتھ دہشت گردی کا واقعہ ہوا، ایسے واقعات پاک چین تعلقات کو سبوتاژ کرنے کی کوشش ہیں.
وفاقی وزیر اطلاعات نے کہا کہ وزیراعظم نے سیکورٹی انفراسٹرکچر اور میکنزم کا از سر نو جائزہ لیا اور اس وقت وہ تمام معاملات کو خود مانیٹر کر رہے ہیں، جب کراچی کا واقعہ پیش آیا تو وزیراعظم شہباز شریف تمام مصروفیات ترک کر کے چینی قونصلیٹ آئے، وزیراعظم نے پاک چین تعلقات کو سبوتاژ کرنے کی کوششوں کو ناکام بنانے کے لئے سیکورٹی میکنزم کو بحال کیا، پاکستان اور چین کے عوام لازوال دوستی میں بندھے ہوئے ہیں، بہت سے ایسے منصوبے ہیں جو اس دوستی کی واضح مثال ہیں جو ہمیشہ کیلئے پاک چین دوستی کو لازوال رشتے میں ڈھالتے ہیں.
اس تاریخی دن کے موقع پر ہم چین کی عوام اور حکومت کو مبارکباد پیش کرتے ہیں، وفاقی وزیر اطلاعات نے پاک چین سفارتی تعلقات کے 71سال مکمل ہونے پر کیک بھی کاٹا،وفاقی سیکریٹری اطلاعات شاہیرہ شاہد بھی اس موقع پر موجود تھیں۔
