لاہور(لاہورنامہ)عید الاضحی پر ریلیز ہونے والی فلموں نے فلم بینوں کی توجہ حاصل کر لی، ہمایوں سعید اور مہوش حیات کی فلم ” لندن نہیں جائوں گا ” کمائی کے لحاظ سے پہلے نمبر پر جارہی ہے ۔
عید الاضحی پر تین پاکستانی فلمیں”لندن نہیں جائوں گا”، ”قائد اعظم زندہ باد ”اور ”لفنگے ”پیش کی گئی تاہم فلم بینوں کی رائے کے مطابق ہمایوں سعید اور مہوش حیات کی فلم زیادہ پذیرائی حاصل کر رہی ہے ۔تینوں پاکستانی فلموں کو عید کے روز 10 جولائی کو ہولی وڈ فلم تھور” لو اینڈ تھنڈر ”کے ساتھ پیش کیا گیا تھا، علاوہ ازیں دیگر فلمیں بھی سینمائوں میں پیش کی جا رہی تھیں۔
پاکستانی فلموں کی کمائی پر نظر رکھنے والے پیج لولی وڈ پکچر کے مطابق ”لندن نہیں جائوں گا” نے ریلیز کے پہلے دو دنوں میں پاکستان سمیت دنیا بھر سے 9 کروڑ روپے کمائے جبکہ ”قائد اعظم زندہ باد ”نے دنیا بھر سے 6 کروڑ 80 لاکھ روپے کمائے۔”قائد اعظم زندہ باد ”نے پاکستان میں ابتدائی دو دن میں ڈیڑھ کروڑ روپے کے قریب جبکہ ”لندن نہیں جائوں گا ”نے سوا دو کروڑ روپے کے قریب کمائی کی۔
فلموں کی کمائی سے متعلق اعداد و شمار کو ہمایوں سعید اور فہد مصطفی نے بھی ری ٹوئٹ کیا۔علاوہ ازیں دونوں فلموں کے علاوہ ہارر کامیڈی فلم ”لفنگے ”نے بھی ملک بھر میں بارشوں کے باوجود اچھی کمائی کی تاہم اس کی کمائی باقی دونوں فلموں کے مقابلے کم رہی۔ عید الاضحی پر پیش کی جانے والی حیدر سلطان کی پنجابی فلم ” اشتہاری ڈوگر ” نے بھی شائقین کی بھرپور توجہ حاصل کی اور یہ امکان پیدا ہو گیا ہے کہ اب دوبارہ پنجابی فلموں کا رجحان پیدا ہوگا۔
پاکستان میں بارشوں کی وجہ سے فلموں کی کمائی متاثر ہوئی، پاکستان کے سب سے بڑے شہر اور صوبہ سندھ کے دارالحکومت کراچی میں عید کے دوسرے روز شدید بارشیں ہونے کی وجہ سے شائقین گھروں تک محدود رہے اور سینما ہال زیادہ تر خالی دکھائی دئیے۔تاہم عید کے پہلے روز کراچی سمیت لاہور اور اسلام آباد میں شائقین نے سینماوں کا رخ کیا اور تیسرے روز بھی فلم بینوں کا رش دیکھا گیا۔
