لاہور(لاہورنامہ) چیف سیکرٹری پنجاب عبداللہ خان سنبل نے کہا ہے کہ ڈینگی اور سموگ کے مسئلوں کا تعلق براہ راست لوگوں کی صحت سے ہے، سموگ صرف چند بڑے شہروں تک محدود نہیں بلکہ تمام اضلاع میں سموگ کی روک تھام پر یکساں توجہ دی جائے۔
چیف سیکرٹری پنجاب عبد اللہ خان سنبل کی زیر صدارت کمشنرز اور ڈپٹی کمشنرز کا ویڈیو لنک اجلاس ہوا جس میںڈینگی اور سموگ کی روک تھام کیلئے کئے جانیوالے اقدامات کا جائزہ لیا گیا۔عبد اللہ خان سنبل نے کہا کہ اہم معاملے پر کسی قسم کی غفلت یا کوتاہی کے متحمل نہیں ہو سکتے،پنجاب کے انسداد ڈینگی اقدامات کو قابل تقلید قرار دیا جاتا ہے،فیلڈ افسرن ڈینگی پر قابو پانے کیلئے ایس او پیز پر عملدرآمد یقینی بنائیں۔
چیف سیکرٹری نے گوجرانولہ میں ڈینگی سٹاف کی بھرتی کے عمل کو تیز کرنے کی ہدایت کی ۔انہوںنے مزید کہا کہ فصلوں کی باقیات اور کوڑا کرکٹ جلانے والوں کیخلاف سخت کارروائی عمل میں لائی جائے،سموگ صرف چند بڑے شہروں تک محدود نہیں،صوبہ کے تمام اضلاع میں سموگ کی روک تھام پر یکساں توجہ دی جائے.
سموگ کا باعث بننے والے گردوغبار سے بچنے کیلئے سڑکوں پر چھڑکا ئوکا انتظام کیا جائے،دھواں چھوڑنے والی نجی اور سرکاری گاڑیوں کے خلاف بلاتفریق کارروائی کو یقینی بنایا جائے۔اجلاس کو بتایاگیا کہ رواں سال اب تک 11245 کنفرم ڈینگی کیسز اور 13 اموات رپورٹ ہو چکی ہیں،گوجرانوالہ اور ملتان میں ڈینگی مریضوں میں اضافہ سامنے آرہا ہے،سموگ کی مانیٹرنگ کیلئے سینٹرل کنٹرول روم نے کام کا آغاز کر دیا ہے.
فصلوں کی باقیات جلانے کیخلاف کارروائی کیلئے ڈپٹی کمشنرز کو سیٹلائیٹ تصاویر کی مدد سے علاقوں کی معلومات فراہم کی جا رہی ہے،ایئر کوالٹی کی جانچ کے لئے لاہور میں مختلف مقامات پر آٹھ نئے مانیٹر نصب کئے گئے ہیں۔ اجلاس میں صحت، ماحولیات اورٹرانسپورٹ کے محکموں کے سیکرٹریز نے شرکت کی جبکہ تمام ڈویژنل کمشنرز اور ڈپٹی کمشنرز ویڈیو لنک کے ذریعے شریک ہوئے۔
