لاہور (لاہورنامہ) ملک بھر میں میڈیکل و ڈینٹل کالجوں میں داخلوں کیلئے ایم ڈی کیٹ ٹیسٹ 13نومبر بروز اتوار کو ہوگا جس کے لئے مجموعی طور پر 204253 امیدواروں نے رجسٹریشن کرائی ہے ۔
تفصیلات کے مطابق تحریری ٹیسٹ کا دورانیہ ساڑھے 3 گھنٹے ہوگا ٹیسٹ صبح 11 بجے شروع ہوکر ڈھائی بجے ختم ہوگا۔تحریری ٹیسٹ میں امیدواروں کے لیے موبائل فون اور کسی بھی قسم کی الیکٹرانک گھڑی یا ڈیوائس لانا ممنوع ہو گا ،ٹیسٹ میں بیرون ممالک پاکستان و غیر ملکی 462 امیدوار بھی شرکت کریں گے۔
امیدواروں کو ہدایت کی گئی ہے کہ ایک گھنٹہ پہلے ٹیسٹ مراکز میں ایڈمٹ کارڈ کے ہمراہ پہنچیں۔ کراچی میں تحریری ٹیسٹ ڈاو یونیورسٹی کے اوجھا کیمپس اور این ای ڈی یونیورسٹی میں منعقد کیے جائیں گے۔اس حوالے سے پاکستان میڈیک کونسل کی چیف کواڈینٹر جواد امین خان نے بتایا کہ تمام امیدواروں کو ایڈمٹ کارڈ ان کے گھر کے پتوں پر ارسال کردیے گئے ہیں ،مجموعی طور پر 204253امیدواروں نے رجسٹریشن کرائی ہے .
جس میں سندھ سے 43994، پنجاب میں 83142، اسلام آباد میں 17825، خیبرپختونخواہ میں 46229، بلوجستان میں 9238، گلگت میں 645، آزاد کشمیر 2718جبکہ بیرون مملک سے 462امیدواروں نے رجسٹریشن کروائی ہے۔واضح رہے کہ ملک بھر میں سیلابی صورتحال کی وجہ سے میڈیکل و ڈینٹل کالجوں میں ایم بی بی ایس اور بی ڈی ایس میں داخلوں کے لیے ایم ڈی کیٹ ٹیسٹ 2 ماہ تاخیر کے بعد ہورہا ہے۔
