اسلام آباد (لاہورنامہ)وفاقی وزیر آئی ٹی سید امین الحق نے کہاہے کہ خواتین کو بااختیار بنانا حکومت پاکستان کی اولین ترجیح ہے، نوجوانوں اور بچوں کو ڈیجیٹل مہارتیں سکھانے کے لیئے بھرپور اقدامات کررہے ہیں.
ملک میں ڈیجیٹلائزیشن کے لیئے موثر اقدامات کر رہے ہیں، شہری اور دیہی علاقوں کے مابین ڈیجیٹل تقسیم کے خاتمہ کیلئے پر عزم ہیں۔وفاقی وزیر آئی ٹی سید امین الحق نے پاکستان آئی ٹی یو ڈیجیٹل انکلیوژن ویک کی افتتاحی تقریب سے خطاب کرتے ہوئے کہاکہ حکومت پاکستان انٹرنیشنل ٹیلی کمیونیکیشن یونین کی پاکستان کے لیئے خواتین کو بااختیار بنانے، بچوں کی آن لائن پروٹیکشن اور آئی سی ٹی تک رسائی کے حوالے سے سپورٹ پر شکرگزار ہے۔
امین الحق نے کہاکہ خواتین کو بااختیار بنانا حکومت پاکستان کی اولین ترجیح ہے، نوجوانوں اور بچوں کو ڈیجیٹل مہارتیں سکھانے کے لیئے بھرپور اقدامات کررہے ہیں،مصنوعی ذہانت، بگ ڈیٹا، کلاؤڈ کمپیوٹنگ، موبائل روبوٹکس وقت کی اہم ضرورت بن چکی ہیں، آئی سی ٹی تربیتی پروگرامز کے ذریعے خواتین کو بااختیار بنانے کے لیئے کوشاں ہیں۔ وفاقی وزیرنے کہاکہ وزارت آئی ٹی کا آئی سی ٹی فار گرلز پراجیکٹ’ خواتین کو بااختیار بنانے میں اہم اقدام ہے۔
سید امین الحق نے کہاکہ ملک میں ڈیجیٹلائزیشن کے لیئے موثر اقدامات کر رہے ہیں، شہری اور دیہی علاقوں کے مابین ڈیجیٹل تقسیم کے خاتمہ کیلئے پر عزم ہیں۔ وفاقی وزیر نے کہاکہ پسماندہ اور دوردراز علاقوں میں کینکٹوٹی کے مختلف منصوبوں پر کام جاری ہے۔ سید امین الحق نے کہاکہ وزارت آئی ٹی کے تحت معذور افراد کی آئی ٹی تک رسائی کو آسان بنانے کے لیئے نیشنل آئی سی ٹی کونسل کا قیام برائے معذور افراد بڑا حوصلہ افزاء اقدام ہے۔
وفاقی وزیر نے کہاکہ معذور افراد کو بھی ترقی کے یکساں مواقع فراہم ہونے چاہئیں ،آئی ٹی کے استعمال سے معذور افراد کی زندگی میں بہتری لائی جا سکتی ہے۔ سید امین الحق نے کہاکہ آئی ٹی یو ممبر ممالک کے مابین ڈیجیٹل منتقلی کے حوالے سے تعاون اہم ہے، وزارت آئی ٹی بہتر ڈیجیٹل مستقبل کے لیئے ہر ممکن اقدامات کررہی ہے۔
