بھارت کوسمجھنا چاہیے کہ امن میں ہی ترقی کا راستہ ہے ترقی کیلئے مذاکرات کی میز پر بیٹھ کر بات کرناپڑتی ہے ‘حمز شہباز

لاہور : مسلم لیگ (ن) کے مرکزی رہنما و پنجاب اسمبلی میں قائد حزب اختلاف حمزہ شہباز نے کہا ہے کہ بھارت کو سمجھنا چاہیے کہ امن میں ہی ترقی کا راستہ ہے اورترقی کیلئے مذاکرات کی میز پر بیٹھ کر بات کرناپڑتی ہے جب بھی قوم پر کڑا وقت آیاسب ایک ہو گئے ملک کی تمام سیاسی جماعتیں ملکی معاملات پر متحد ہیں وطن پر قربانیاں دینے والے پاک فوج کے شہدا اور ان کی ماؤں کو سلام پیش کرتاہوں ،حسن صدیقی جیسے نوجوان پذیرائی کے مستحق ہیں دعاہے کہ اللہ تعالی پاکستان کو بھارت کے جنگی جنون کے شرسے محفوظ رکھے ۔پنجاب اسمبلی میں میڈیا سے غیر رسمی گفتگو کرتے ہوئے انہوں نے کہا کہ پاکستان نے ہمیشہ امن کا پیغام دیاہے ہمیں جب بھی چیلنج کیاگیا تو مسلح افواج نے قوم کومایوس نہیں کیابھارت کو سمجھنا چاہیے کہ امن میں ہی ترقی کا راستہ ہے ترقی کیلئے مذاکرات کی ٹیبل پر بیٹھ کر بات کرناپڑتی ہے میری دعا ہے دونوں ملک قیام امن کیلئے کاوشیں کریں۔انہوں نے کہا کہ دونوں ملک ایٹمی قوتیں ہیں ایٹمی قوتوں کے ناطے ذمہ داری کا ثبوت دینا چاہیے اگر مودی کو الیکشن جیتنا مقصود ہے تو کوئی اور حربہ استعمال کریں مودی جنگی جنون پیدا کرکے سستی شہرت حاصل نہ کریں پاکستان اور بھارت سمیت دنیا بھر کامیڈیا مودی کے جنگی جنون پر انگلیاں اٹھا رہاہے پاکستان ایٹمی قوت اور بائیس کروڑ لوگوں کا ملک ہے انشااللہ امن کا راستہ نکلے گا۔