اسلام آباد: پاکستان پیپلز پارٹی کے سیکرٹری جنرل نیئر بخاری نے کہا ہے کہ بھارتی وزیر اعظم کے دھمکی آمیز رویے سے معلوم ہوتا ہے کہ بھارتی وزیراعظم اپنے ہوش و حواس کھو بیٹھے ہیں اور جنگی جنون ان پر بری طرح سوار ہے،مودی نے جنگ چھیڑی تو ختم کرنا اس کے اختیار میں نہیں ہو گا، منگل کو اپنے جاری کیے گئے ایک بیان میں انہوں نے کہا کہ نریندر مودی بھارتی پارلیمنٹ میں عوام اور پارلیمنٹ کی تنقید سے توجہ ہٹانے کے لئے ناکام کوششوں میں مصروف ہیں، فضائی دراندازی پر بھارت کو پاکستان کی فضائیہ اور مسلح افواج کا جواب اور حساب یاد رکھنا چاہیے۔انہوں نے کہا کہ پاکستان پرامن ملک اور اس کے عوام پرامن قوم ہیں لیکن کسی بھی جارحیت کے خلاف جواب دینے کی بھرپور صلاحیت رکھتے ہیں، سکھوں کی بین الاقوامی پارلیمنٹ کا اعلامیہ مودی حکومت کے خلاف چارج شیٹ ہے۔انہوں نے کہا کہ بھارت کے اندر مودی کے خلاف موثر آواز بلند ہورہی ہے یہ آواز دراصل مودی کی جماعت کی انتہاپسندی کے خلاف ہیں۔نریندر مودی اور ان کی پارٹی آئندہ عام انتخابات میں عبرتناک شکست کے انجام سے خوفزدہ ہیں ان کی پارٹی پر بدترین خوف طاری ہے۔انہوں نے عالمی برادری پر زور دیتے ہوئے کہا کہ وہ امن دشمن نریندر مودی کے خلاف اقدامات اٹھائے کیونکہ مودی سرکار سیاست اور اقتدار کے لئے خطے کے امن کو داو¿ پر لگا رہی ہے۔انہوں نے کہا کہ پاکستان کے عوام ،مسلح افواج اور سیاسی قوتیں ملکی سلامتی کے لئے متحد ہےں اور ایک پیج پر ہیں بھارت آگ سے کھیلنے کی کوشش نہ کرے، جنگ بچوں کا کھیل نہیں، اگر مودی نے جنگ چھیڑی تو پھر ختم کرنا اس کے اختیار میں نہیں ہو گا، جنگ کے خطرناک نتائج برآمد ہوں گے۔
