لاہور:صوبائی وزیرصحت ڈاکٹر یاسمین راشدنے سروسز ہسپتال کے گائنی اور بچہ وارڈ کا دورہ کیا۔ اس موقع پرپرنسپل سروسز انسٹی ٹیوٹ آف میڈیکل سائنسز پروفیسر ڈاکٹر ایاز محمود اور میڈیکل سپرنٹنڈنٹ ڈاکٹرسلیم چیمہ و دیگر موجود تھے۔ڈاکٹر یاسمین راشد نے گائنی اور بچہ وارڈ میں صفائی ستھرائی اور مریضوں کو دی جانے والی طبی سہولیات کا جائزہ لیا۔صوبائی وزیر صحت ڈاکٹر یاسمین راشد نے اس موقع پر کہا کہ وزیراعظم عمران خان کی ہدایت پر میڈیکل سپرنٹنڈنٹس کو ہسپتالوں میں صفائی ستھرائی کا خاص خیال رکھنے کا حکم دیا گیا ہے۔پنجاب بھر کے ہسپتالوں کی حالت بہتر کرنے کے لئے تمام تر وسائل بروئے کار لائے جا رہے ہیں۔انہوں نے کہا کہ پنجاب کے مختلف اضلاع میں دیئے گئے صحت انصاف کارڈز کے ذریعے عوام کو ریلیف مل رہا ہے۔
