لاہور (لاہورنامہ) صوبائی وزیر صنعت و تجارت ایس ایم تنویر سے لاہور اور فیصل آباد کی بزنس کمیونٹی کے نمائندوں نے ملاقات کی۔ملاقات کے دوران انڈسٹری کو درپیش مسائل پر بات چیت ہوئی۔
وفد نے صوبائی وزیر کو وفاقی ایوان صنعت و تجارت کے انتخابات میں یونائٹیڈ بزنس گروپ کی شاندار کامیابی پر مبارکباد دی۔
صوبائی وزیر صنعت و تجارت ایس ایم تنویر نے کہاکہ ہمیں بزنس کے مسائل مل کر حل کرنا ہیں۔ انڈسٹری کو فروغ دے کر معیشت کی سمت درست کر یں گے۔انڈسٹری کا پہیہ چلے گا تو ہی معیشت آگے بڑھے گی۔
ایس ایم تنویر نے کہاکہ حکومت کی کاوشوں اور کسانوں کی محنت سے کپاس کی دگنی پیداوار حاصل ہوئی۔اسی طر ح گندم کی بھی ریکارڈ پیداوار حاصل کریں گے۔نئے کارخانے لگانے کیلئے سرمایہ کاروں کو ون ونڈو کی سہولت دی گئی ہے۔ لاہور کے بعد فیصل آباد سمیت 5بڑے شہروں میں بزنس فسیلیٹیشن سینٹرز تکمیل کے آخری مراحل میں ہیں۔
صوبائی وزیرایس ایم تنویر نے کہاکہ وفاقی چیمبر کے الیکشن میں بھرپور کامیابی بزنس کمیونٹی کے یوبی جی کی قیادت پر اعتماد کا مظہر ہے۔بزنس کمیونٹی کو کسی صورت مایوس نہیں کریں گے،مل کر کاروباری سرگرمیاں بڑھائیں گے۔
بزنس کمیونٹی نے صوبائی وزیرایس ایم تنویر کو زبردست خراج تحسین پیش کیا۔امان پراچہ نائب صدر ایف پی سی سی آئی نے کہاکہ بزنس کمیونٹی کے مسائل کے حل کیلئے ایس ایم تنویر ہمہ وقت کوشاں دکھائی دیتے ہیں۔
ریجنل چیئرمین ایف پی سی سی آئی ذکی اعجاز، عبدالرؤف مختار، میاں تنویر ریاض، چوہدری خالد محمود اور دیگر ایف پی سی سی آئی آفس میں ہونے والی ملاقات میں موجود تھے۔
